An tEarrach Thiar

Fear ag glanadh cré
De ghimseán spáide,
Sa gciúnas shéimh
I mbrothall lae.
Binn an fhuaim
San Earrach Thiar.

Fear ag caitheamh
Cliabh dá dhroim
Is an fheamainn dhearg
Ag lonrú
I dtaitneamh gréine
Ar dhuirling bhán.
Niamhrach a radharc
San Earrach Thiar.

Mná i locháin
In íochtar diaidh-thrá
A gcótaí craptha,
Scáillí thíos fúthú,
Támh-radharc síothach
San Earrach Thiar.

Toll-bhuillí fanna
Ag maidí rámha,
Currach lán d'éisc
Ag teacht chun cladaigh
Ar ór-mhuir mhall
I ndeireadh lae
San Earrach Thiar

Máirtín Ó Direáin (1910-1988)